SENSASJONELT: - 40 graders skilnad ute og inne fredag morgon, skriv yr.no i føremiddag

Bærum, 21.12.12: - I morgontimane fredag hadde Veitastrond heile 19,8 minusgrader, og hjå John Molland var det knappe 20,5 grader innandørs, melder "yr.no" i ett stort oppslag fredag.
Som overskifta tyder på, var det ein skilnad på 40 grader nett der!

Det er Norsk rikskringkasting og Meteorologisk institutt sin vidfamnande vêr-portal, yr.no, som melder dette i eit illustrert oppslag fredag.
Vêr og vind (som nettstaden vår difor heiter på yr.no sin normalspråkform) tykkjer at dette er sers verdefull og so høgst sensasjonell vêrinfo at vi trekkjer det fram i ljoset, diverre i eit heller seint ettermiddagsljos.
Det er Tone Merete Lillesvangstu, mogeleg NRK-medarbeidar ved NRK-Sogn og Fjordane, som fann fram til denne sensjonelle vêrhendinga i dag.

- Men ved NRK-Buskerud ...
Vêr og vind tykkjer synd i NRK-kollegane ved NRK-Buskerud som ikkje fann fram til nokon i Hemsedal som i morgontimane fredag kunne konstatere nær femti graders skilnad på temperaturene ute og inne. So vel kl. 04.00, 05.00 og 06.00 var det minus 27,6 grader utandørs ved den automatiske vêrstasjonen i Hemsedal. Med same innetemp'en som hjå han John i Veitastrond i Luster i Sogn, var det ein skilnad på 49 grader i Hemsedal.
- Det hadde vore noko å melda om fra NRK-Buskerud i dag, tykkjer vi.
- Eller at NRK-Finnmark ikkje meldte om 54 grader temperaturskilnad ute og inne på Couvddatmohkki, Karasjok kommune, onsdag i veka var.
Vi gratulerar yr.no-redaksjonen med dette oppslaget, men seier oss samstundes leie for at vi innlemmer dette stykkjet i vår verdskjende HALL OF SHAME.
- - -
Vi vonar at direktør Anton Eliassen ved Meteorologisk institutt, som er meteorologfagleg ansvarleg for stoffet på yr.no, korkje les nemnde oppslag på yr.no eller vårt her på Vêr og vind.
Copyright: Bernt Lie